ملخص:

حد يعرف ان مرتبات الناس اللي شغاله في السوشيال ميديا تترواح ما بين الـ 2000 جنية الي 4000 جنية شهريا ؟؟؟

هو الموضوع صعب للدرجادي عشان ياخدو المبالغ الكبيرة دي , هاجي اقولك لاء بصلها من زاوية تانية اللي هي ايه ؟ 

اللي هي العائد المادي الكبير اللي بتحققة الشركة او المؤسسه اللي عندها موظفين سوشيال ميدا محترفين وبيقدروا يوصلو للعملاء بتوعهم بسرعه من خلال التواصل ع النت وبيع المنتجات اونلاين :D

طيب لو عاوز اشتغل في السوشيال ميدا اعمل ايه ؟

كل اللي هتعمله انك تتعلم صح وتكتسب كل يوم معلومة جديدة , فيه مواقع كتير تقدر تتعلم منها سوشيال ميديا وتاخد منها شهادات كمان تقدر تحطها بالطول والعرض في الـ cv بتاعك .. زي ايه طيب ؟؟

زي موقع coursera وموقع Hubspot 

12 نصيحة للمستجدين في السوشيال ميديا

لو كل ما تفتح موقع توظيف تلاقى مطلوب وظيفة مسوق الكترونى على السوشيال ميديا وانت مش لاقى شغل، أو قاعد ليل نهار على الفيس بوك ونفسك تبقى السوشيال ميديا شغلك، أحب اقولك الموضوع مش صعب ومش سهل، ممكن السوشيال ميديا تبقى شغلتك، بس قبل ما تشتغل أو حتى تتعلم تشتغل لازم فى شوية نصايح وأفكار تاخد بالك منهم الأول عشان تلاقى الدنيا بعد كده ماشيه معاك زى السكينه فى الحلاوة :)

1 – أخيراً هتشتغل فى السوشيال ميديا

إحنا بتوع like , share , comment هنقعد شويه على فيس بوك وشويه على تويتر وهناخد مرتب , دى كانت أول حاجة إتكتبت فى الكتاب العظيم “مذكرات مغفل”، حضرتك لما تشتغل فى السوشيال ميديا هتبقى قمة راحتك وسعادتك هى اللحظات الى هتقدر تبقى فيها أوف لاين ومش مجبر إنك تبقى قاعد على النت، إنسى فكرة إن الشغلانة دى مريحة، لو بتدور علي الراحة خدها من قصرها وإنفد بجلدك.

2- السوشيال ميديا مش شوية بوستات

مش شوية بوستات بتنزل على صفحة أو لينكات بتاخدها من موقع وتنشرها على صفحة، فى حاجة إسمها “RSS Feeds” ممكن تنشر كل حاجة أوتوماتيكك و أحسن منك، لا بتاخد فلوس ولا بتاخد أجازه.

اللى بيميزك ويخلى حد يدفعلك فلوس انك مسوق ولست ناشر، وإن الزبون عنده أهداف متطلبات بتعمل على تحقيقها وفق إستراتيجيه وخطة عمل.

3- الأكاونت الشخصي

لو إنت فاشل فى ادارة الأكاونت الشخصي الخاص بيك إبعد عن المجال ده خالص، مش هتنفع فيه، نجاحك فى التسويق بيبتدي من قدرتك على التسويق لنفسك، علشان كده بحاول أدير الاكاونت الشخصي بتاعي دلوقتي، مش هيبقى باب النجار مخلع :) .

4- التفاعل داخل الصفحه أو الحساب

مش دايما هو معيار النجاح، الأهم توصل لأهدافك التسويقية، يعنى لو إنت بتسوق لمنتج غالى جداً مستهدف فئة معينة ولنفترض فئة الاثرياء، ودخل عندك فى الصفحة 10 الآف من متوسطي الدخل وعملوا تفاعل عالي جداً على الصفحة لكن محدش إشترى خالص إنت كده فشلت فى إنك تحقق أهدافك، بالرغم إن الصفحة شكلها بيقول إنك ناجح ومكسر الدنيا.

5- الدنيا لسه بخير

هتلاقى ناس كتير وصفحات كتير بتساعدك وبتنشر معلومات قيمه جداً خاصة في مجال التسويق والسوشيال ميديا، وتقعد تتعب نفسك وتفكر إيه المقابل وبيعملوا كده ليه، ياااااه الدنيا لسه فيها خير، آه لسه فيها خير طبعاً، بس هما بيسوقوا لنفسهم وبيبنوا لنفسهم براند فى المجال وبيحاولوا يكبروا إسمهم زى ما أنا بعمل دلوقتى كده وده اللى بيقولوا عليه Inbound Marketing، إنك تقدم خدمات كتير بدون مقابل مادى لكن ليها عائد معنوي دلوقتي وبتتحول لعائد مادى فى المستقبل.

6- بتاع كله

متضيعش وقت فى فكرة المسمي الوظيفى ليك فى البداية، أحب أعرفك إنت بتاع كله، سوشيال ميديا اكيد، SEO ماشى، مدخل بينات مفيش مانع، كاتب محتوى ميضرش وممكن تعمل للناس اللى معاك فى المكتب شاى فى وقت فراغك، هيا آه مطحنه في البداية، بس هتستفاد جدا وتلم كمية خبرات ومعلومات متميزة هتساعدك فى المستقبل.

7- أيام سودا

بيقولوا بتوع طب يا عينى بيفضلوا طول عمرهم يذاكروا لان الطب كل يوم بيتغير انسف الفكره دى السوشيال ميديا والتسويق الالكترونى كل ربع ساعه تحديث لازم تفضل طول عمرك تذاكر علشان تفضل متميز وشاطر . ده انت هتشوف ايام سودا.

8- 50 % و 50%

السوشيال ميديا 50 % علم و50 % ابداع وفكر، إبداع من غير علم مش هتعرف تمتلك الادوات الى تساعدك على النجاح و علم من غير ابداع مش هتقدر تستخدم الادوات بشكل جيد يوصلك للنجاح.

9- تابع

لازم تتابع أكبر عدد ممكن من الصفحات، وتشوف الناس بتدير الصفحات إزاى، وإيه الأفكار الجديدة، والمنافسين بيشتغلوا إزاى، ومفيش مشكلة إنك تاخد فكرة وتعمل شئ شبيه بيها، الأهم إنك تستخدم الفكرة فى موضعها المناسب مش تقليد وخلاص، ده مش معناه إنك متفكرش أو إن فكرك كله يبقى جوه الصندوق، لو إنت تقدر تنسف الصندوق نفسه انسفه (نسف الصندوق دى واخدها من shereen_words#)، حاول تستفيد من أفكارك وأفكار الناس وألاهم تحقق أهدافك وتحل المشاكل الى هتواجهك.

10- إوعى تدوس enter، إوعى تدوس enter

لازم تنسى المفتاح ده خالص، لازم تراجع كل حرف بتكتبه مره وإتنين، لازم تقيم اللى هتنشره من كل النواحى قبل ما تدوس enter، لو مستهون بالموضوع أحب اعرف ان فى الكيبورد حرف “ص” جنب “ض”، لك ان تتخيل لو غلط وإنت بتكتب فى بوست كلمة “عرض خاص”، كل سنة وإنت طيب بمناسبة الحفلة اللى هتتعمل عليك فى اليوم ده.د

11- متعملش البحر طحينة

لما تتعلم وتبقى خلاص قادر تشتغل وجالك أول عميل، متعملش البحر طحينه لإنه بكل بساطه هيجبلك علب بلاستيك ويقولك إملاها طحينه، إوعده بأقل من اللى هتقدر تعمله لحد ما تاخد الخبرة، وإقبل مقابل أقل من اللى كنت متوقعه بس مش أقل قوى يعنى، لإن الأهم تشتغل كتير علشان تاخد خبرات أكبر وأغلى بكتير من المقابل اللى هتاخده وتقدر تحقق الأهداف اللى وعدت بيها.

12- إتّك عالصبر

مش بين يوم وليلة هتبقى مشهور ومحترف وكل الشركات والعملاء بيترموا عليك، بس أكيد لو فضلت مصمم على إنك تتعلم أكتر وتطور من نفسك دايماً، أكيد فى يوم هتوصل لمكانة كبيرة وخلى بالك مستحيل حد يعلمك كل شئ، عندك حاجتين ممكن تتعلم بيهم حاجات كتير أوى أولهم جوجل، دوَّر وإقرا، والحاجة التانية إيدك، جرب وإغلط وصلح لحد ما تعرف وطوَّر من نفسك وكده هتوصل هتوصل.