ملخص:

تحديد تكلفة الإعلانات له اساسيات مينفعش أقول أي رقم بدون دراسة
الأساسيات دي بتتلخص في النقط التالية:

1.  نوع الإعلان والهدف منه
يعني انت عاوز تحقق ايه وهتوصل له ازاي؟ لان مثلا اعلان الفيديو على فيسبوك تكلفته بتختلف عن اعلان التفاعل مع الصور،، والاتنين تكلفتهم أصل من اعلات الليدز مثلا لإن نوع الإعلان دا غالي جدا.
وعليه مش هينفع نحدد أي تكلفة إلا لما نبقى عارفين احنا عاوزين ايه،، تفاعل بس (كومنتس ولايكس وشير) والتفاعل دا بيكون على صور أوفيدو،، ولا الهدف اننا نجمع عدد معين من بيانات العملاء المستهدفين، وساعتها هنشتغل بإعلان الليدز (تجميع البيانات).
الهدف من الإعلان بنسميه call to action ودا الل بيحدد نجاح الحملة أو فشلها،، وصياغة الـ call to action بتفرق جدا ما بين انك تقول للعملاء (للحجز سجل بياناتك) أو تقول له (للاستفسار سجل بياناتك)

2. محتوى الأعلان
المحتوى ممكن يخليك تحقق الهدف من إعلانك بمنتهى السهولة أو يخلي اعلانك كأنه متعملش أصلا،، والمحتوى هنا مش بس النص المكتوب، لكن كمان الصور أو الفيديو اللي هيشد الناس أو لا،، هتخليهم يعملوا اللأكشن اللي انتا عاوزه أو لا، وكل ما كان المحتوى جذاب بيشد الجمهور المستهدف كل ما كان دا نجاح للحملة.
ملاحظة هامة: كل جمهور وله طريقة للمحتوى اللي هيتقدم له ويشده، على حسب نوع الجمهور والمنتج والخدمة اللي معمول لها الإعلان.

3. التارجت
ودا من أهم هواملعوامل نجاح أو فشل الإعلانات،، ودا مش هيحصل إلا لما تبقى دارس جمهورك المستهدف كويس جدا وعارف هيكون رجاء ولا نساء ولا الاتنين، متوسط أعمارهم، اهتماماتهم، هتحتاج تتارجت فئة معية من الموظفين، هتعمل تارجت لفئة محددة والفئة دي هتتارجتها ازاي، الأماكن بتاعتهم فين وهتوصل لها صح ازاي، هتقدر تضيف اي للتارجتينج يزود نجاح اعلانك.
نصائح:
- اذا هتعمل اعلان تستهدف فيه أكتر من بلد خلي كل بلد في حملة مستقلة علشان تقدر تقيس مردود كل بلد على المنتج والخدمة بتاعتك،، وكذلك لما تحب تعمل اعلان على فيسبوك وانستاجرام اعمل حملة منفصلة لفيسبوك وحملة تانية لانتاجرام.
- الجمهور بتاعك بيختلف التارجت له من دولة لدولة، فمثلا لو جمهورك مصري ممكن تشتغل على فيسبوك وانتساجرام ويوتيوب،، ولو خليجي ممكن تشتغل على سناب شات وتويتر وانستاجرام ويوتيوب
- إذا عندك الأدز مانجر (مدير الإعلانات) ادخل وشوف كل أنواع الاهتمامات والتارجت الموجودة في فيسبوك وانستاجرام،، لإنها بتختلف،، وتويتر بيختلف عنهم تماما ويوتيوب

4. توقيت الإعلان
هل الإعلان توقيته بشكل عام مناسب ولا لا،، يعني مثلا مينفعش تعمل اعلانات عقارات في أوقات امتحانات (بيبقى المردود قليل جدا) والعامل التاني في التوقيت هو الموسم لكل منتج أو خدمة،، أوقات المواسم والمنافسة في الإعلانات بتزود التكلفة بشكل كبير، فلازم تبقى عارف كويس امتى مواسم المنتج أو الخدمة اللي بتعلن عنها.

5 – الحملات التجريبية
ودى بتعملها لما تشتغل على منتج او خدمه لأول مره ومعندكش اى خبره فى مجالهم فلازم تعمل حملتين او تلاتة على سبيل الاختبار وكل حمله بمحتوى مختلف وتحاول تنوع فى التارجت عشان فى اآخر تقدر توصل لأفضل محتوى وافضل تارجت ودى بنقول عليها split test ولازم صاحب الشغل يكون عارف ان ده لمصلحته لإنك هتقدر توصل لأفضل حاجه فى أقل وقت.

6. تكلفة الحملة نفسها
بعد ما حددت كل اللى فات وعملت كذا حمله تجريبيه هتكون طلعت بنتايج مثال (جالكوا 40 اتصال من حمله كانت ب 20 دولار) فكده انت بقيت عارف ان متوسط تكلفة المكالمه هى نص دولار ، فبتظبط حسابات الإعلانات اللى جايه على الأساس دا (وبتراعى جدا ان سعر تكلفة الحمله ممكن يزيد او يقل على حسب كل العوامل اللى قولناها في الأول).
والسؤال: امتى الحمله تكون بسعر قليل ونجاح كبير؟
لما تكون عامل محتوى جذاب جدا بفكره مميزه جدا ومتارجت صح جدا جدا جدا .. اذا عرفت توصل للمعادله دى هتقدر تحقق نجاح اكبر بتكلفه اقل من المعتاد
بالنسبه ليوتيوب : فتكلفة اعلاناته مختلفه لأنها بتعتمد على حسب لغة الفيديو والمحتوى بتاعه والكلمات البحثيه اللى هتضيفها اثناء انشاء الحمله الإعلانية وتكلفة كل كلمه كام وايه هى اهتمامات الجمهور اللى انت مستهدفه على يوتيوب،، وهل هتحدد ظهور اعلانك فى قنوات او فيديوهات بعينها ولا لا،، كل ده مش هتعرف تحدده إلا لما تحدد الـ keywords الخاصة بإعلانك على يوتيوب وتبقى عارف متوسط تكلفتها كام.

المشاكل والمفاهيم الغلط

أولا: للأسف فى ناس فى المجال بتاعنا بتشتغل بطريقة الـ 10000 ريتش بـ 10 دولار،، فيجى عميل مش عارف اى حاجه يعجبه الرقم الكبير بالمقابل القليل ده ويبدا يرسم فى خياله ان من الـ 10000 واحد ممكن يكلمه 1000 مثال وبيتصدم لما يلاقى ان الإعلان بدأ وخلص ومفيش حد اداله رنه حتى. انا مش ضد اعالنات الريتش لكن ضد استغالل جهل العمالاء لإن ده بيأثر على سمعة المجال والناس اللى بتشتغل وهى فاهمه بتعمل ايه ولازم هنا نفهم العميل نوع كل إعلان وفايدته ايه ونتايجه المتوقعه ايه.

ثانيا: لما تقعد مع عميل ويقولك هتجبلى كام لايك للصفحه؟ لازم تفهمه ان اللايكس مبقتش مقياس لنجاح اى حمله ولا ليها اى لزمه حاليا،، اللى ممكن يركز عليه فعال هو هيبقى فيه كام متابع على انستجرام او تويتر وده بيتحدد بعد كل العوامل الكتير اللى اتكلمنا عليها.

ثالثا: هتجبلى كام كومنت وكام لايك على البوست؟ المفهوم ده غلط جدا حتى لو هيبقى اعلان تفاعل لإن كل العوامل اللى فاتت بتحكم الموضوع ده

رابعا: الأي حاجه فى أى حاجه بكام؟ خلوا دايما السؤال ده بشكل عام قدام عنيكوا وتحت اى ظرف او طلب سعر من العميل وانتوا مش دارسيين المجال والتارجت والمنافسين متدوش العميل اى سعر،، وعلى فكره العميل بيحب جدا اللى يبان قدامه انه فاهم هو بيعمل ايه

خامسا: موضوع مشاهدات اليوتيوب الـ 1000 مشاهده ب 10 دولار،، الكارثه مش فى ان ممكن تبقى المشاهدات fake والقناه ممكن تتقفل نهائيا،، الكارثه ان لو حتى هما حقيقيين العميل بيفرح بيهم وفى االآخر مبيلاقيش مردود ولما تيجى تقوله هعمل لك اعلان بمبلغ اكبر بكتير من الـ 10 دولار عشان تجبله العدد ده بجد وتحقق مكاسب تلاقي رد فعله بيحسسك انك بتنصب عليه.

اكبر كارثه فى السلبيات والمفاهيم الغلط ان للأسف ناس كتير من المجال بتاعنا هى اللى بتروجلها وبتوصل للعملاء صوره لأحلام ورديه من الفلوس اللى هيكسبها بسببهم وفى الآخر بيفوق على صدمه.