ملخص:

اولا إذا كنت ناوي عالتجارة فموقع aliexpress ليس الخيار الأفضل، aliexpress بعرض منتجات للبيع للend user يعني زي أمازون، بتشتري المنتج و بعدها الseller بشحنلك اياه مباشرة بدون تأخير إذا كان ابن حلال، مع إنه ممكن تلاقي عليه عروض لمنتجات على كميات لكن ممكن تحصل صفقة أفضل في Alibaba.

موقع Alibaba يعتبر الخيار الأفضل في حال كنت ناوي تشتري بكميات للتجارة وليس للاستخدام الشخصي وفكرته إنك بتتعامل مع المصانع مباشرة أو موزعين على نطاق ضخم جدا، حط ببالك إنك رح تتعامل مع مصانع قدرتها الانتاجية هي الأكبر بالعالم، يعني مرة مثلا لقيت مصنع لأنظمة الإضاءة قدرته الانتاجية للمبات الLED حوالي 50 مليون حبة باليوم!! شايف مرونة الأسعار قديش ممكن تكون؟

لكن طريقة الشراء على Alibaba ليست مباشرة زي أمازون و aliexpress إنتا إذا عجبك منتج بتطلب عرض سعر و بتبدأ مراسلات بينك و بين مندوب المصنع أو الموزع خلال 24 ساعة لحد ما تتفقو على سعر معين بناسب الطرفين، يعني مش كل شخص بقدر يحصل نفس السعر.

الجزء الأهم هدول الtips مهمين جدا خدهم بعين الاعتبار لما تتعامل مع التجار على Alibaba :

1- لا تقتنع من أول نتيجة بحث بتلاقيها، كل ما دورت أكثر كل ما لقيت نتائج أحسن.

2- السعر المعروض للمنتج دائما هو سعر تقريبي (من-إلى) ممكن يكون أكثر و ممكن أقل، انتا و شطارتك بالمفاصلة بالعقل.

3- لا تتخيل أبدا إنو الصينيين أغبياء، إذا أصريت عالمفاصلة بالسعر كثير، البياع رح يوافق بالعادة و كل ما تطلب سعر أقل بعطيك بس هيك مش لإنه خدوم و بحبلك الخير لا هو فعليا بقلل جودة المنتج الي بدك تشتريه مقابل الخصم الي بعمللك اياه.

4- دائما خلي كل مراسلاتك عن طريق نظام الرسائل تبع الموقع، إذا طلب منك إيميل أو سكايب اعتذر منه لأنه المراسلات والاتفاقات الي بتصير خارج الموقع عالإيميل مثلا، الموقع غير مسؤول عنها و رح يطقعلك في حال التاجر غشك.

5- تأكد تماما إنو إذا دفعت المصاري للصينيين ما رح يرجعو إلا بمعجزة، تأكد مية بالمية من الي بدك تعمله قبل ما تدفع، خلي الدفع هو آخر خطوة تقوم فيها، الي بدخل بطن الصينيين ما بطلع خدها قاعدة.

6- اطلب عينات دائما، أوعك تخاطر و تطلب كمية كبيرة من أولها، ما بتعرف شو المقلب الي ممكن توكله، ممكن الجودة تطلع مش زي ما بدك أو ممكن الجمارك ما يفوتولك البضاعة مثلا، دايما اطلب عينات بالأول، في حال ما عجبوك فإنتا خسرت مبلغ بسيط جدا مقابل الآلاف الي كنت رح تحطها عالكميات.

7- لا تنغر بلطافة البائع، لما تتعامل معه رح يحبك زي ولاده بس الفكرة إنو هدفه في النهاية يبيع، همة ناس لطيفين جدا بالعادة بس لما تشتري منه وتخلص بتختفي اللطافة هاي في أغلب المرات.

8- ابعت طلب سعر لعدة مصانع مش واحد و قارن بينهم وشوف الأفضل إلك.

9-في حال اشتريت و وصلتك البضاعة و كنت راضي عنها لا يعني هذا إنو المصنع ممكن المرة الي بعدها يعطيك زي ما بدك، في كل مرة لازم تكون حذر، أحد الأصدقاء خسر ما يقارب ال55 ألف دينار بضاعة بسبب جودتها السيئة مع إنه كان يتعامل مع نفس المصنع من 15 سنة يعني قبل ما يكون الموقع موجود أصلا، والسبب إنه صار خسارة عند المصنع فقرر يعوضها بالزباين المساكين، كن حذر دائما.

في النهاية لا تنسى التأكد إنه المنتج بتاعك ما رح يدرك بالجمارك إسأل وتنور بلاش تطلع بخسارة كبيرة بالآخر.

للتسجيل فى : aliexpress

https://www.aliexpress.com/

 للتسجيل فى  : alibaba

https://www.alibaba.com/