ناس كتير نفسها تبدأ تشتغل عالنت بمصدر دخل محترم، لكن للأسف جزء كبير بما فيهم الناس اللي شغالة من زمان بيحصروا نفسهم في جزء صغير في العالم ده.
مبدئيا الشغل على النت مش على قد upwork وfreelancer، المواقع دي تعتبر نقطة في عالم الانترنت.
..
في البوست ده أنا هفتح كلام وأفكار للناس اللي ناوية تبدأ لسه، أو الناس اللي بتشتغل من زمان وعايزه تغير مجال شغلها.
(الطرق اللي هتكلم عنها تحت تتشرح في كتب، فممكن تعتبروها headlines لو حد مهتم بحاجة فيهم يبدأ يدور عالنت ويتعلم ولو محتاج مساعدة او سؤال في حاجة يسأل وناس كتير هتساعده).
..
ايه الطرق اللي ممكن اكسب بيها من النت ؟
1- إنك تقدم خدمة بمقابل مادي:
وده اللي أغلب الناس بتعمله، واللي مصطلح freelancer لما بيتقال هنا غالبا بيقصدوا بيه الناس دي.
كل اللي عليك إنك تتعلم حاجة وتبقى شاطر فيها (تصميم - ترجمة - برمجة - كتابة .. إلخ) وبيبقى فيه عميل بيطلب منك الخدمة دي ويدفعلك حق شغلك
-تتعلم فين ؟
اختار المجال اللي تحب تتعلمه ودور في مواقع الكورسات اللي مالية النت ومفيش اكتر منها دلوقتي.
-تشتغل فين ؟
فيه مواقع بتقوم بدور الوسيط زي upwork , freelancer وغيرهم كتير، العميل بيدخل يطلب خدمة زي مثلا تصميم لوجو، وانت بتعرض عليه انك تعمل التصميم وبتاخد فلوس مقابل شغلك.
(شخصيا أنا مش بفضل الطريقة دي لإني شايفها طريقة مؤقتة بتعتمد عليك أولا وأخيرا وكإنك عامل باليومية، بمعنى على قد شغلك بتكسب ولو في فترة حصلك ظروف ومشتغلتش مش هيبقى فيه مصدر دخل)
..
2- لو انت شاطر جدا وعندك خبرة في مجال معين، قدمها مقابل فلوس:
المعلومة دلوقتي تمنها غالي أوي، لو بتتقن حاجة وشاطر فيها ممكن تعمل كورس وتعرضه على موقع من مواقع الكورسات الكتيرة بفلوس، أو ممكن تألف كتاب "ebook" وتبيعه عالنت. 
فيه مثل بيقول لو عايز تبقى غني، إعمل كتاب وبيعه.
..
3- اشتغل على اليوتيوب:
اليوتيوب من أكتر الحاجات اللي بتكسب عالنت وده طبعا لو بتعرف تعمل فيديوهات بنفسك وبتقدم حاجة مفيدة.
..
4- CPA Networks
Cost per action networks 
ودي شركات بتديك فلوس على حاجات معينة بتخلي الناس تعملها، وبيندرج تحتها حاجات كتير زي:
CPI = Cost Per Install
الشركة بتديك برنامج تنشره وكل لما حد ينزله عنده الشركة بتديك فلوس
CPD = Cost Per Download 
بترفع ملف أو أي حاجة وتنشره، وكل عدد معين من التحميلات بتاخد عليها فلوس، ومن أشهر المواقع فالموضوع ده openload و uploaded
CPS = Cost Per Sale "affiliate"
وده تقريبا أغلب النت قايم عليه، بيبقى فيه product شركة عايزه تبيعه، كل اللي عليك انك تنشره وكل لما حد يشتريه بتاخد نسبة عليه، من أشهر المواقع فالموضوع ده clickbank وكمان مواقع التحميل أي حد يشتري premium account عن طريقك بتاخد نسبة

دول أشهر حاجات CPA وفيه حاجات تانية كتير زي تخلي ناس يسجلوا ايميلاتهم، أو تخليهم يقولوا رأيهم في product أو website ... إلخ

5- تشتغل مع أمازون amazon.com
أمازون يعتبر عالم كبير لوحده ومش هيكفيه بوست كامل، بس باختصار كل اللي عليك انك تختار product من امازون وتنشره، لو حد دخل على link ال product واشتراه في خلال مدة معينة "مثلا يوم" بتاخد نسبة من المبيعات
..
6- لو عندك product بيعه
فيه مواقع كتير بتقدر تبيع من خلالها، على سبيل المثال amazon, ebay, etsy 
كل واحد ليه مميزات وعيوب
etsy = متخصص في ال handmade accessories 
او ما يطلق عليها DIY = Do It Yourself 
بمعنى لو بتعرف تعمل حاجة بنفسك اعملها واعرضها للبيع عليه
Amazon = تقدر تكسب من عليه كتير جدا لو بتبيع
بس هتواجه صعوبة لو انت من العالم العربي وخصوصا في شحن الحاجة اللي هتبيعها، أمازون كمان بتوفر خدمة اسمها FBA ودي خدمة بتحل مشكلة الشحن نسبيا، لو حد عايز يعرف عنها معلومات أكتر ممكن أشرحها.
..
7- معندكش product ؟ هات product وبيعه
ببساطة لو معندكش حاجة تبيعها ممكن تشتري حاجات من الصين بسعر الجملة وتعرضها للبيع بسعر أعلى من اللي اشتريتها بيه.
..
8- إعمل موقع عالنت.
أنا خليت النقطة دي للأخر لإن كل اللي فوق ده ممكن تعمله من خلال الموقع.
أهم حاجة في نقطة الموقع هي الصبر، عندك استعداد تصبر 6 شهور أو سنة عشان تبدأ تكسب ؟ لو اه فده أكتر حاجة بتكسب على النت.
بس مش أي حد هيعمل موقع ويقعد 6 شهور او سنة جنبه هينجح، فيه عوامل كتير وحاجات كتير لازم تتعلمها بس الموضوع يستاهل التعب.
..
*الطرق اللي فوق دي بيندرج تحتها أفكار كتير جدا ممكن تتعمل، شوف لو فيه طريقة عجبتك ابدأ اعمل search عنها في جوجل.
*متبدأش في حاجة إلا لما تكون متأكد إنها مناسبة ليك.
*أي فكرة أو طريقة من اللي فوق بتقدر تحولها لشغل وتجيب من وراها دخل كويس، لكن كلهم بيحتاجوا صبر.
*متشتتش نفسك وتشتغل في أكتر من طريقة في نفس الوقت، اختار طريقة واحد وركز فيها فترة مناسبة عشان تبدأ تشوف النتايج.
*أغلب الشغل في النت لو عايز تكسب منه، حاول يكون ال target بتاعك بعيد عن الدول العربية وبتستهدف الأجانب.