اذا كنت انا اللى ماسك شغل الـ Social media لمطاعم ام حسن
اذا كنت انا اللى ماسك شغل الـ Social media لمطاعم ام حسن كنت هقترح على الاداره تعمل اللى هاقول عليه ده وفى اسرع وقت
رئيس مجلس ادارة المطاعم يعمل فيديو يقول فيه الاتى :
اولا : اعتذار رسمى باسم سلسلة المطاعم للبنات اللى حصل الاعتداء عليهم جوه المحل ( بعد ما يكون اتصل بيهم تليفونيا واعتذرلهم بشكل شخصى ) وده يقدر يوصله عن طريق الاكونتات بتاعتهم اللى انتشرت جدا بسب اللى حصل
ثانيا : دعوة البنات واسرهم للفطار معاه فى نفس الفرع وفى نفس المكان اللى كانوا قعدين فيه
ثالثا : انه يقدملهم تعويض ولو معنوى عن اللى حصل بان يكون ليهم ولاسرهم خصم 50 % لمدة شهر على اى حاجه هيطلبوها وهما فى اى فرع من فروع ام حسن
رابعا : التحويل للتحقيق لكل اللى اتسببوا فى المشكله دى من العامليين فى الفرع اللى كان فيه المشكله وانهم بنفسهم كإدارة المطاعم هيتخذوا الاجراءات القانونيه لكل من اعتدى بالقول واليد حتى لو هتوصل لتحقيقات رسميه فى النيابه والاجراءات اللى بعدها ( وهيتابعوا اخبار التحقيقات دى على الصفحه اول بأول )
خامسا : ان سلسلة المطاعم بتقدم دعوه لكل المطاعم والبراندات انهم يساندوا المنتقبات فى حرية اختياراهم لمظهرهم بانهم يقدموا عروض خاصه وان مطاعم ام حسن هتبدا بالمبادره دى وتعمل خصومات لكل مجموعه معاهم بنت منتقبه فى حدود مثلا 10 او 15% او ممكن مثلا اطباق الحلويات تكون مجانا ليهم - وفى مطاعم وبراندات بدات تستغل الازمه دى بانها تعمل كده فعلا -
سادسا : انه بيقدم اعتذار لكل زباين سلسلة المطاعم بان ليهم خصومات على كل الاوردارات سواء جوه المطاعم او التيك اواى ولتكن مثلا 5 % او 10 % لغاية اخر رمضان
وطبعا ده هيتصرف عليه فلوس اعلانات كتير جدا عشان تحسين الصوره بتاعتهم
يمكن حطيت نفسى مكان فريق الـ social media اللى هما فى الوش واكتر ناس بتستقبل الشتايم والانتقادات الحاده بسبب اللى حصل ومطلوب منهم يتعاملوا معاها فالطبيعى اذا كنت مكان المسؤل عنهم اقدم افكار تحل الازمه اللى مكنش ينفع انها تحصل اصلا وكمان نرجع ثقة العملاء من جديد بدل البيانات المنيله اللى نزلوها وكل شويه ببيان شكل وفيديو ناقص وحذفوه
تصرف ادارة مطاعم ام حسن على السوشيال ميديا زود المشكله اكبر بتخطبهم وعدم مصداقيتهم
فى الاول والاخر المواقف اللى زيى دى لازم نتعلم منها ونفكر كويس اذا اتحطينا فيها ممكن نتصرف ازاى
ومعاك فالمصالحة بس نضيف الطرفين البنات والراجل واولاده مع صاحب البراند ف فطار ويتصور لايف دة هيبقي افضل حل .
طبعا ده في حالة انه ميحصلش اي تطور تاني من ناحيته او من ناحية الاجهزة الرقابية او الحكومة .