ازاي تكون freelancer : مستويات الفريلانسر السبعة
أى طريق فى الحياة بيمر بسبع مستويات عادة
و الفرى لانسر شرحه كذلك
ازاي ؟
المستوي 1 : ايه فرى لانسر ده ؟
و فيها بتكون بتشوف بوست عن الفرى لانسر , جروب , او صفحة او موقع او تسمع عن محاضرة او تشوف فيديو .. و تكون بتكتشف العالم ده لأول مرة
و بتكون فى المستوي ده بنظام .. اما ناخد فكرة و نشوف يطلع ايه ده
و غالبا فيه ناس كتير بتقول , لا يا عم شكله مش مجالي , او مش بتصدق ان فيه ناس بتشتغل من بيتها و تكسب فلوس و بما يساوي قيمة الدولار كمان
و بصراحة عندك حق ما تصدقش , انا نفسي ما صدقتش لغاية ما سحبت اول فلوس ليا من ماكينة صرف ...
سمات المرحلة دي : الاكتشاف .. البحث .. التدوير .. الاسئلة المكررة .. عدم التصديق و الاندهاش الكامل و قراءة حاجات كتير او متابعة حاجات كتير
لكن بتكون مش بتنزل برجلك فى البحر خالص
.
المستوي 2 : يلا نجرب
و فيها بتعمل تجربة بدائية .. تعمل بروفايل سيء او فيه مشاكل كتير .. صورة وحشة .. كلام مكتوب فيه اخطاء كتير لغوية .. نماذج سيئة جدا ..
و بتبتدي تقدم و تجرب و مش بتلاقي رد .. بس بتقول ادينا بنجرب و اكيد زي ما قالوا هما شهرين و السنارة هتشبك !!!
سمات المرحلة دي : عك كتير .. و اعتقاد انك اول ما تعمل بروفايل , الزباين هتنزل عليك زي المطرة
و فيه ناس من كتر الثقة دي مش بتقدم اصلا .. و بتتصور انها مش لازم تقدم
و بتتصور ان الزباين اول ما تشوف بروفايله , هتبعتله و تقوله انت فين من زمان يا مبدع انت اللى هتغني يا منعم
ده تصور كثير مننا مر بيه و الله , احنا المصريين جبروت بقى
.
المستوي 3 : مفيش فايدة
و فيها بتشعر باليأس .. ان ما حدش بيرد .. و اشعارات الغاء طلبك لكل مشروع بتقدم فيه بتنزل عليك زي المطرة برضه .. و مش بتشعر ان المشكلة فيك او طريقتك , لكن بتقول لنفسك , هو مفيش حاجة اسمها فرى لانسر و انا حمار اني صدقت
. و ده المستوي اللى بيفقد الأمل فيه حوالي 80% من اللى بيجربوا الموضوع
المستوي 4 : ادينا بنحاول .. ورانا ايه ؟
و فيها بيكمل معانا للمستوي 4 بقى .. 20 % من اللى بيقولوا .. ما نبعت كل يوم و نحاول كل يوم ايه المشكلة يعني .. زي وقت الفيسبوك , و اهو بنحسن لغة و بناخد فكرة عن الشغل المطلوب فى مجالي.. ورانا حاجة او بنتعب ؟
قاعدين على كمبيوتر فى البيت و بنشرب عصير او شاي .. لا بنروح مشاوير تعب و لا بنحضر انترفيو .. حاجة مش صعبة .. مجرد تكتكة زراير على كيبورد .. و ادينا بنحاول .. ورانا ايه ؟ ورانا ايه ؟ بنحكي و نحاول
المستوي 5 : فيه حاجة غلط فيا و هضبطها
و فيها بتقول , اكيد المشكلة فيا , و بتبتدي تسأل القدام و تبعتلنا او تبعت هنا , و بتبتدي تراجع الموضوع و تشوف بروفايلك كان فيه ايه ؟ طيب نماذجك كويسة ؟
طيب مستواك محتاج يتحسن ؟ طيب تدويرك غلط ؟ طيب اختيارك للمجال كان صح ؟
تبتدي تسأل و مع كل تفصيلة بتكتشف انك فيه تفاصيل صغيرة عندك فى بروفايلك كانت مطفشة الزباين مثلا و ان فيه كلمات كنت بتبعتها فى رسايل التقديم كانت بتدي انطباع انك مش محترف خالص .. بتكتشف اخطاء مهولة
و تستغرب و تقول ازاي ما خدتش بالي منها
تكتشف ان مستواك محتاج يتحسن او مجالك يتغير لحاجة بتحبها اكتر
و تستغل وقت الفراغ و ان ما حدش بيرد و تطور نفسك
لغاية ما يحصل ايه ؟
.
المستوي 6 : فيه واحد رد .. اخيراااان
و هنا بعد ما بتصلح الاخطاء الشنيعة اللى فى طريقتك او شغلك
بتلاقي حد بيرد .. و بتبتدي تحسب الفلوس اللى هتجيلك و هو لسه بيسألك عن الشغل و هتعمله ازاي .. و هوب تلاقيه مش بيرد
فتزعل اوي . ثم ترجع للمستوي 5 و تشتغل و تلاقي حد يرد تاني
و يتكرر الموضوع لغاية ما حد يرد و تتكلموا فى الشات و تتفقوا و ترتبوا
و تبتدي تشتغل
و تركز اوي فى الشغلانة و تعملها بضمير
و انك مش فارق معاك حتى لو طلع نصاب
بس تركز فى اتقان شغلك اوي و تثق فيه و تطبق قواعد التعامل فى ارسال الشغل و الشات فى الموقع و كدة
و بنسبة كبيرة بيكون زبون حلو
و هوب .. يقفل العقد و يبعتلك الفلوس و يكتب فيدباك حلو
و هنا حتى لو كان العقد بخمسة دولار
بتلاقي نفسك فى فرحة عارمة
و تطير فى البيت فارد دراعاتك على طريقة ابو تريكة
و تفتح شباك بيتك و تقول : يا ام نيازي .. صحي نيازي
.. انا خلصت اول شغلانة فرى لانسر يا بشرررررر
و تكلم كل صحابك و تبعت لكل الناس ,
و تخش تكتب بوست هنا فى الجروب و تشاركنا فرحتك برضه
و بعدها تنتقل للمستوي 7
.
المستوي 7 : الأسطي .. البرو .. الخبير
و فيها بتكون عملت شغلانة تانية و تالتة و رابعة و خامسة
و بتكون خلاص نجحت و سحبت ارباحك بعد صراع طويل مع المرض فى البنوك و التعقيدات المصرية و تجربة الوسائل المختلفة
بس بتكون حاسس ان خلاص كدة فل و حاجة جميلة و الحمدلله
و تبتدي الناس تسألك : بتشتغل ايه ؟
و لما تقولهم فرى لانسر يقولوا لك :
ايه فرى لانسر ده ؟
تقوم تقولهم بتؤدة كدة :
بصوا .. هقولكم
و تبتدي تاخدهم للمستوى 1 .. و هكذا
و هيا دي مستويات الفريلانسر يا شباب
قلت اشرحها بطريقة مخففة بعيدا عن التعقيدات
بس ده غالبا اللى بيحصل لأغلب اللى ماشيين فى طريق الفرى لانسر
ربنا يوفقكم دايما .. بالتوفيق