اول خطوة للي حابين يشتغلوا فريلانس...

اول خطوة للي حابين يشتغلوا فريلانس

الناس اللي عايزين يشتغلوا فريلانسرز، ركزوا معايا ونبدء كدا من الأول خطوة بخطوة. المقصود بالفريلانس هو انك تعمل مهمة محددة بمقابل مادي محدد وينتهي دورك بمجرد ما تخلص المهمة وتستلم الفلوس، يعني مش موظف بأجر ثابت سواء دوام كامل او جزئي، ومؤخرًا بقى مقصود بالفريلاس هو الشغل على الإنترنت زي انك تكتب مقال، تعمل تصميم، تبرمج موقع، تدخل بيانات، تشتغل سكرتير، تترجم... الخ. تقريبًا أي مهارة انت تقدر تشتغلها على الإنترنت.

في البوست دا هتكلم عن أول خطوة خالص لازم تعملها قبل ما تشتغل، وهي أن يبقى عندك مهارة من الأساس تشتغل بيها، لأن انت مش هتشتغل في حاجة انت مبتعرفش تعملها. الحاجات اللي ممكن تشتغلها على النت كتير جدًا وتشمل (الكتابة، الترجمة، التسويق، المبيعات، الاستشارات، ادخال البيانات، التصميم، البرمجة والتطوير، سكرتير عن بعد، التدريب والتدريس، بيع المنتجات، عرض الخدمات، التصوير..الخ). عشان تشتغل يا إما انت بالفعل متمكن من مهارة من دول زي الكتابة مثلا وبتعرف تكتب، يا اما انت متعرفش اي حاجة من الحاجات دي ولسه ابيض وعايز تتعلم، وهفترض في البوست دا انك معندكش اي مهارة وعايز تبدء تتعلم. 

1 - مبدأيًا كدا متشغلش بالك بالشغل دلوقتي خالص ولا تسأل عنه، انت محتاج تركز على انك تتعلم وتبقى برنس وخلاص، واول خطوة انك تحدد بالظبط عايز تتعلم ايه. الموضوع بيختلف من شخص للتاني يعني في ناس ممكن تحب البرمجة، ناس عايزة تتعلم التصميم، ناس حابة التسويق اكتر.. كله واحد ومفيش حاجة اسمها انهي اللي فرصه في الشغل اكتر! كله بيشتغل وكله بيكسب حسب جهده وجودة شغله. 

2 - ركز على انك تتعلم من البداية خالص لحد ما توصل لمستوى متوسط على الأقل. لو مش عارف تبدء منين او تتعلم ازاي ممكن تبدء بالكورسات الاونلاين، وفي مواقع كتير بتقدم كورسات محترمة في اي مجال انت عايزه سواء بالعربي او بالانجليزي زي مثلا:

كورسيرا: https://www.coursera.org/

ايدكس: www.edx.org

فيوتشر ليرن: www.futurelearn.com

يوديمي: https://www.udemy.com/ 

المواقع اللي بالعربي في منها:

رواق: https://www.rwaq.org/

إدراك: https://www.edraak.org/

مهارة: https://www.maharah.net/

دا طبعا غير موقع يوتيوب عليه مئات وآلاف الفيديوهات والكورسات المجانية اللي ممكن تتعلموا منها اي حاجة.

3 - اعمل خطة للتعلم: متقعدش تقول اما افضى النهاردة شوية هتعلم.. لا حدد كدا كل يوم وقت معين انت بتتعلم فيه. من وجهة نظري ان في المتوسط ممكن تتقن أساسيات أي مهارة في فترة من شهر الى 3 شهور حسب وقتك وشطارتك. الموضوع مش صعب خالص طالما انت محدد لنفسك خطة معينة. 

4 - بعد ما تتتعلم أساسيات المهارة اللي هتشتغل بيها، ابدء اتعلم مهارات الشغل بتاعها نفسه.. جوجل مليان آلاف المصادر اللي هتقولك ازاي تبقى برنس في ادخال البيانات، او تبقى خبير ماركتنج في وقت قليل، أو ايه الكتب اللي لازم تقراها لو انت هتشتغل في الكتابة. المهارات دي هي اللي هتساعدك تشتغل وتعرف ازاي تطور نفسك بسرعة.

وأخيرًا في المرحلة دي متشغلش بالك بأي حاجة غير انك تتعلم، يعني متسألش على الخطوة الجاية وانت لسه مبدأتش الخطوة الحالية لأن بمجرد ما تتعلم هتعرف لوحدك الخطوة الجاية ايه فالافضل تخلي كل تركيزك في انك تتعلم. 

دي كدا اول خطوة عشان تشتغل فريلانس، ان شاء الله البوست الجاي في السلسلة دي يبقى عن الخطوة اللي بعدها وازاي تظبط البروفايل بتاعك وتبني بورتفوليو كويس تشتغل بيه حتى لو انت مشتغلتش قبل كدا. اعملوا منشن لاصحابكم اللي عايزين يتعلموا ويشتغلوا على النت، وكالعادة انجوي& هاف فن 

مجال الكتابة ايه اقسامه و أبدئه اازاي؟
ابدأي بالكورس دا: http://www.withsalah.com/dawn-by-mohammed-ibrahim/