فى كتير منا شاف فيلم امير الظلام بتاع عادل امام فى مشهد ملعب الخماسى لما كانو بيلعبو ماتش كورة .. كان فى الفريق اللى بيلعبو واحد كده طول بعرض بجناحات يسد عين الشمس اسمه حيحا ... محدش يقدر يعدى منه وبيطيح فى الكل وعلشان كده كان عمال يزعق ويقلهم ..ابعد عن حيحا
كتير منا بيشتكو ان التفاعل قل ومفيش ظهور ولا اى حاجة وفلوسى بتروح ع الفاضى واللى يحلف ويقول وحياة خالى حسن انا كنت بعمل نفس الاعلان وكان بيجب اكتر من كده بكتير ... انا مصدقك على فكرة وخالك حسن كان صحبى .
معروف دايما ان رمضان هو موسم الاعلانات وبيتحضر ليه من قبلها بكتير علشان المنافسة فيه بتكون كبيرة جدا واقل دقيقة اعلان فى التلفزيون بتكون ب 100 الف لو قناة نضيفة وبما ان الاتجاه بيزيد للسوشال ميديا فهما دخلو الملعب ده تخيل اللى بيدفع 100 الف ج فى دقيقة ممكن يدفع كام علشان اعلان فى الفيس فى اليوم على الفيس تخيل ... تخيل .. مش اقل من 5 الاف فى اليوم ..
سوق العقارات يعتبر ده الوقت بتاعه لان بيعتمد اكتر على المصريين اللى فى الخارج وبعد شوية الاجازات هتبدا وهما المستهدفين الاول بالنسبة ليهم .. واحد المنتج بتاعه متوسط سعرمليون جنيه تخيل اعلانه ممكن يكون بكام فى الوقت ده .
عمنا مارك مبيفرقش معاه الغلابة اللى زينا دى والاعلانات عنده بالمزاد يعنى اللى هيدفع اكتر هيظهر اكتر واسرع كمان .
طيب نعمل ايه علشان نبعد عن حيحا ؟؟
فلوسك قليلة وتقدر تستنى يبقى استنى لما رمضان يخلص واعمل شغلك .. مينفعش ولاازم دلوقتى يبقى نفك الكيس شوية ونعلى بالميزانية وبقدر الامكان نوسع الاستهداف الى واحدة او اتنين بالكتير .
متوسط ظهور اى بوست للمعجبين فى اى صفحة تقريبا 10% يعنى لو عندى 100الف البوست بيظهر الى الف فقط .. يبقى اول حاجة اشتغل غلى الناس اللى عندى فى الصفحة دول بتوعى وحبيابى ومربيهم على ايدى .
معلومات ع الماشى :
متوسط الناشطين على الفيس الشهر اللى فات فى مصر من 25 الى 30 مليون
محافظة القاهرة بنسة 34%
محافظة الاسكندرية 12%
محافظة الجيزة 9%
التليفونات المحمولة بنسبة 89% نظام اندرويد 76 %
رجال 65% نساء 35% اعلى نسبة كانت من سن 18 الى 24 سنة
اللى بيضغط على الاعلان متوسط 8 مرات فى الشهر
مصدر الاحصائيات audience insights ( عرض الجمهور ) فى مدير الاعمال
صحيح قبل ما امشى ... مدير الاعلانات وانت بتشوف الاحصائيات منه للاعلان ابقى ظبط التارخ وخليه من بداية الحملة ... وخلى بالك ان النتائج فيه بتكون متاخرة والاحسن تشوف من باور اديتور