حابب احكي عن تجربتي في سحب الفلوس بتاعتي.

(للمصريين)

الحمد لله أخييرا دي أول مرة أسحب فلوسي بنفسي من شغلي على النت!

عن طريق باي بال و بنك (QNB)

أنا كل كلامي هيكون عن تجربتي الشخصية، لأني معنديش معرفة ولا خبرة بالبنوك آد كدا ، هحكي اللي حصل معايا بالظبط وازاي قدرت اسحب الفلوس!

إيه الخطوات عشان أقدر أسحب فلوسي عن طريق الباي بال؟

أول حاجه بتعمل أكونت ليك على موقع باي بال عادي، وبعدين هتروح البنك الأهلي القطري QNB 

هتقولهم عايز أعمل " Visa Debit " لأن دي اللي انا عملتها وسحبت بيها ( ف مش عارف لو كريديت هتنفع ولا لأ )

تقريبا لو انت طالب في جامعة في حاجتين:

لو سنك عدى 21 سنة هيطلب منك بطاقة ولي أمرك أو حد بيصرف عليك.. ودا ليه؟ عشان دي حاجه تثبت الدخل بتاعك كل شهر.

ولو سنك مجابش ال 21 سنة بتعمل حساب الشباب تقريبا.

الشروط هي انك لما تفتح الحساب لازم تحط فيه فلوس بداية من 1000ج وطالع ، وهياخدوا منهم 50ج تقريبا رسوم.

بيديك ورقة كدا فيها رقم الحساب بتاعك وبيقولك استنى اسبوعين وتعالا استلم الفيزا بتاعتك :))

انا استلمتها بعد 3 اسابيع تقريبا عشان كان في تأخير في وصول الفيزا للبنوك.

هتروح تستلم الفيزا لما يعدي الفترة دي، وهتمضي انك استلمت الفيزا ، وهيقولك انزل حط الفيزا في ال ATM عشان تعمل لنفسك رقم سري مكون من أربع ارقام... ساعتها بتقدر تسحب فلوسك اللي فتحت بيها الحساب عادي.

مبروك! إنت كدا معاك الفيزا ، تعالا بقى لـ باي بال والتعامل معاه.

بتفتح موقع الباي بال بتلاقي فوق كدا خانة اسمها " Wallet " هتدخل عليها هتلاقي حاجه اسمها " Link a card " 

بتختارها وبعدين بتضيف بيانات الفيزا اللي معاك ، وبعد ما تضيف الفيزا لازم تفعلها وهتلاقي خيار التفعيل موجود برضه بس " مش فاكر كان فين الحقيقة "

اول ما تفعل الفيزا على باي بال بتاعك انت كدا خلاص تقدر تحول فلوسك من أي موقع على الباي بال عادي.

أنا حولت فلوسي خلاص على باي بال ووصلت الحمد لله، 

إزاي اسحبها على الفيزا من باي بال؟

في حاجه اسمها Withdraw " سحب " ، دا اللي بتختاره عشان تسحب فلوسك للفيزا .

طب ايه هو نظام باي بال؟ 

كل سحبة ليك من باي بال للفيزا بتكون مقابل 5 دولار ، طب أعمل ايه عشان اتجنب الموضوع دا؟

الأول عايزك تعرف ايه نظام باي بال؟

نظام باي بال في معظم دول العالم بيعمل سحب تلقائي " Auto Withdrawal " مجانا كل اول شهر خلال يوم 1 و 2 و 3 في الشهر

أما في مصر مش شغال النظام دا، ف تعمل ايه؟

تستنى ال 3 ايام دول يعدوا وتيجي من رابع يوم وتعمل Withdraw أو سحب للفلوس ، هيتخصم منك 5 دولار ؟ آه هيتخصموا بس بمجرد ما تبعت ل دعم الباي بال وتقولهم انك من مصر وان السحب الأتوماتيكي دا مش شغال بيرجعولك ال 5 دولار تاني :))

هتلاقي تحت في موقع باي بال " Contact Us " عشان تراسلهم

لو عايز بقى تسحب في نص الشهر أو أي يوم تاني هيكون مقابل 5 دولار :))

اول ما بتعمل السحب هيقولك ان الفلوس بتوصل في خلال ( 5 الى 7 ) ايام شغل في البنك 

انا استنيت اسبوع ورحت لقيت الفلوس بتاعتي جت على الفيزا الحمد لله

(( ملحوظة مهمة )) انا اخدت الدولار ب 17.6ج 

ومش عارف الصراحة الناس اللي كانت بتقول انه بيوصل على 17.2 بيحصل معاهم كدا ازاي!

تعديل: السحب على البطاقة دي واقف حاليا..